مصاب بالزهايمر؟؟ يبقى أنت أكيد معلق رياضي

عندك زهايمر.. بتنسى كويس.. مش بتعرف تفرق بين اللاعيبه.. ما تخافش مش هقولك تساعدني!! أنا بس هقولك مبروك أكيد هتبقى معلق رياضي، لأن قواعد قبول المعلقين الرياضيين في مصر تشترط أن تكون قد تجاوزت سن الـ60 ومصاب بالزهايمر وغير قادر على النطق ومش بتعرف تقرأ ولا حتى اللغة العربية ولازم وحتما ولا بد تكون بتعرف تقول 'حلوووة' و'شيكل المباراة وضح يا جماعة'، ولو بتعرف تنيم الناس يبقى خلاص اعتبر نفسك اشتغلت.

عندما يجرك حظك التعس إلى متابعة فريقك المفضل في الدوري العام فأنت محكوم عليك بارتفاع حاد في ضغط الدم مع دوار قد يتحول إلى جلطة في المخ ده إذا كان الكابتن'.........' صاحب نظرية و'هووووبا' هو المعلق، ويبقى حظك كويس لو الذاكرة ما أسعفتوش ونسي يقول 'حلووووة'.. ولاتقلق إطلاقا فأنت لست مصابا بأي هلاوس سمعية وبصرية فالكرة فعلا مازالت في منتصف الملعب!!!

إما إن كان حظك أفضل قليلا فأنت على موعد مع نجم التحليل الرياضي السريع وصاحب نظرية 'الشيكل -بكسر الشين وزيادة حرف جديد هو الياء-' وتصبح الجملة المكررة 'يبقى هاهاها شيكل المباراة كده اتضح يا جماعة النادي الأهلي بيلعب بإفيلينو في الشمال وأدامه'.. ووالنبي حد يقول له إن إفيلينو ده مات من زمان ده حتى جلبيرتو قرب يبطل كرة، أما الجملة الأخرى 'هاها ها ضحك- بفتح الضاد والحاء وتسكين الكاف - عليه ولعب على مصيدة التسلل'.

وخد فين يوجعك بقى لو منتخب مصر بيلاعب فريق من إفريقيا يبقى هتلاقي تركيبة عجيبة من الأسماء بتتحدف عليك وأنت وشطارتك إن كنت تعرف تفرق إن كانت عربي ولا هيروغليفي وما تتعجبش هتلاقي الفريق اللي قدام مصر عباراة عن لعيب واحد بيلعب في كل حتة في الملعب.. واتفرج بقى لو مصر لاعبت فريق أوروبي يبقى 'هاهاهاها الراجل ده تعبنا يا جماعة..'

هذا إن كنا نتحدث عن معلقي الضغط العالي والذبحة الصدرية أما إن تحدثنا عن معلقي الشلل الرعاش والباركنسون فلا يمكن أن ننسى أبدا ملهم تلك المدرسة السيد... -بيتهئلي إنتوا عارفينه- هذا الرجل يمتلك موهبة فظيعة في التنويم المغناطيسي.. وبجد أمتع 90 دقيقة ممكن تنام فيها بدون إزعاج هي اللي سعادته بيعلق عليها.. ويمكن لما تنام ربنا يكرمك ويعلق لك على الماتش في الحلم الراجل بتاع 'يا خبر أبيض يا جماعة' ساعتها.. موت أحسن ويبقى!!!

وبجملة المعلقين بقى، إذا كنت من الأعيان وتمتلك وصلة دش ويمكنك أن تتابع قنوات الـart فنصيحة لك إذا علمت أن 'محدثقم هو محمض القو...' فعليك التخلص فورا من وصلة الدش لأنك في غنى عن أن تسمع أسماء اللاعبين كلها مفخخة أقصد مفخمة و'يا سلام عليك يا برقات يا ملك الحرقات'، وعلى نفس المحطة فيه معلق تقريبا 'مصري' -أنا عن نفسي مش مصدق- الراجل ده أسلوبه تطور جدا في التعليق بس عنده مشكلة حقيقية في إنه مش جي يذيع وتقريبا كده جي يخلص على اللاعيبه و'تعرفوا يا جماعة بحسبة بسيطة يبقى يوم رونالدينهو واقف بـ.... يعني في الساعة....'، وتبقى كارثة بجد لو علق على مباراة فيها مصر وتونس أحسن لك تقلب وتتابع 'عصام الشوالي' التونسي الجنسية لأنه على الأقل هيكون مصري شوية.

أما سيادة اللواء فمش هقول عنه حاجة غير 'حرام عليك يا مجرم بطلت بشير التابعي الكورة في مصر'، أما 'الأستاذ 9 في واحد' –اللهم لاحسد- فلا أعرف سر سعادته وتخيله الدائم إنه وش السعد على منتخب مصر في 1998 وربما وجد الرجل أن 'هي دي هي فرحة الدنيا' هي السبب في الفوز ببطولة إفريقيا في بوركينا فاسو وبروحها الخالدة قدرنا نأخذ بطولة 2006..

ويبدو أن مسئولي الإذاعة والتليفزيون في مصر لا يعترفون بموضوع كبر السن ولا يدركون معنى آخر لانتهاء الصلاحية –ونفاذها- سوى الذي يسمعونه في هواتفهم المحمولة (ده طبعا إذا كان حد فيهم بتخلص صلاحية بطاقته قبل ما يشحن تليفونه بكارت من أبو ألف جنيه، ده إن كان كارت أصلا)..

مــــســــتـــنـــــي رأيــــــــــــــــــكم ..